2015 წლის 23 სექტემბერს, საქართველოს ფეხბურთის ფედერაციის აღმასრულებელმა კომიტეტმა შპს საფეხბურთო დავების განმხილველი სპორტული ტრიბუნალის დირექტორის თანამდებობიდან გაათავისუფლა ზურაბ ბიწაძე.
საქართველოს ფეხბურთის ფედერაცია არის შპს საფეხბურთო დავების განმხილველი სპორტული ტრიბუნალის 100% წილის მქონე პარტნიორი (მესაკუთრე) და აღნიშნული ტრიბუნალის წესდება ითვალისწინებს ასეთი პარტნიორის მიერ დირექტორის თანამდებობიდან ნებისმიერ დროს ყოველგვარი დასაბუთების გარეშე გათავისუფლებას. მიუხედავად იმისა, რომ ზურაბ ბიწაძე გათავისუფლდა თანამდებობიდან, მან თვითნებურად გააგრძელა საქმეების წარმოებაში მიღება და საკუთარი თავის დავების განხილვის დროს მედიატორად განსაზღვრა. ამავდროულად, ზურაბ ბიწაძემ არ უზრუნველყო ტრიბუნალის საქმეების და ტრიბუნალის ბეჭდის გადაცემა არც ტრიბუნალის პარტნიორის (საქართველოს ფეხბურთის ფედერაციის) და არც ახალი დირექტორის მიმართ, რითაც დაარღვია კეთილსინდისიერების მოვალეობა ორგანიზაციის (შპს საფეხბურთო დავების განმხილველი სპორტული ტრიბუნალი) წინაშე, დაარღვია შპს საფეხბურთო დავების განმხილველი სპორტული ტრიბუნალის წესდება და საფრთხის ქვეშ დააყენა ტრიბუნალის გამართული ფუნქციონირება.
ზურაბ ბიწაძემ თანამდებობიდან გათავისუფლების შემდეგ, წარმოებაში მიიღო ა(ა)იპ რაჭა-ლეჩხუმის და ქვემო სვანეთის ფეხბურთის ფედერაციის და ა(ა)იპ გურიის რეგიონალური ფეხბურთის ფედერაციის დავები. ამავდროულად, ზურაბ ბიწაძემ ორივე დავის განხილვის დროს საკუთარი თავის დანიშნა მედიატორად. ორივე დავა ეხებოდა 3 ოქტომბერს დანიშნულ სფფ-ს ყრილობაზე ა(ა)იპ რაჭა-ლეჩხუმის და ქვემო სვანეთის ფეხბურთის ფედერაციის და ა(ა)იპ გურიის რეგიონალური ფეხბურთის ფედერაციის დელეგატების წარდგენის საკითხს.
საქართველოს ფეხბურთის ფედერაციამ განცხადებით მიმართა შპს საფეხბურთო დავების განმხილველი სპორტული ტრიბუნალის ახალ დირექტორს, რომ ამ უკანასკნელს ბათილად ეცნო ზურაბ ბიწაძის, როგორც არაუფლებამოსილი პირის მიერ 2015 წლის 25 სექტემბერს გამოცემული ორი დადგენილება ა(ა)იპ რაჭა-ლეჩხუმის და ქვემო სვანეთის ფეხბურთის ფედერაციის და ა(ა)იპ გურიის რეგიონალური ფეხბურთის ფედერაციის დავების განხილვის დროს ზურაბ ბიწაძის მედიატორად განსაზღვრის თაობაზე, რაც შპს საფეხბურთო დავების განმხილველი სპორტული ტრიბუნალის დირექტორმა დააკმაყოფილა. ამავდროულად, საქართველოს ფეხბურთის ფედერაციამ და შპს საფეხბურთო დავების განმხილველმა სპორტულმა ტრიბუნალმა მიმართეს სასამართლოს ტრიბუნალის ორგანიზაციული ბეჭდის უკანონო მფლობელობიდან გამოთხოვის შესახებ. თბილისის საქალაქო სასამართლოს მოსამართლის მაია სვიანაძის 30.09.2015 წლის განჩინებით (საქმე #1107560-15) და 30.09.2015 წელს გაცემული სააღსრულებლო ფურცელით ზურაბ ბიწაძეს აეკრძალა შპს საფეხბურთო დავების განმხილველი სპორტული ტრიბუნალის ბეჭდის გამოყენება.
მიუხედავად იმისა, რომ გათავისუფლებულიყო ტრიბუნალის დირექტორის თანამდებობიდან და ასევე ბათილად იყო ცნობილი ზურაბ ბიწაძის მიერ საკუთარი თავის მედიატორად განსაზღვრის თაობაზე მიღებული დადგენილებები, მან მაინც განაგრძო საქმის წარმოება და სხვადასხვა საინფორმაციო საშუალებების მიერ გავრცელებული ინფორმაციის თანახმად, ა(ა)იპ რაჭა-ლეჩხუმის და ქვემო სვანეთის ფეხბურთის ფედერაციის და ა(ა)იპ გურიის რეგიონალური ფეხბურთის ფედერაციის დავებთან მიმართებაში, 2015 წლის 30 სექტემბერს მიიღო გადაწყვეტილება, რომელსაც არავითარი იურიდიული ძალა არა აქვს. რადგან სახეზეა არაუფლებამოსილი პირის მიერ გადაწყვეტილების მიღების ფაქტი.
შპს საფეხბურთო დავების განმხილველმა სპორტულმა ტრიბუნალმა, ტრიბუნალის დებულებით და წესდებით გათვალისწინებული ნორმების დაცვით, ა(ა)იპ რაჭა-ლეჩხუმის და ქვემო სვანეთის ფეხბურთის ფედერაციის და ა(ა)იპ გურიის რეგიონალური ფეხბურთის ფედერაციის დავების განხილვის დღე ჩანიშნა 1 ოქტომბერს და ორივე საქმე განიხილა ზეპირი მოსმენით.
შპს საფეხბურთო დავების განმხილველი სპორტული ტრიბუნალის დასაბუთებული გადაწყვეტილებით, რომელიც 2 ოქტომბერს ჩაბარდა საქართველოს ფეხბურთის ფედერაციას, ა(ა)იპ რაჭა-ლეჩხუმის და ქვემო სვანეთის ფეხბურთის ფედერაციის და ა(ა)იპ გურიის რეგიონალური ფეხბურთის ფედერაციის დელეგატებს - გია გილიგაშვილს და გოჩა ტყებუჩავას მიეცათ უფლება მონაწილეობა მიიღონ საქართველოს ფეხბურთის ფედერაციის 3 ოქტომბერს დანიშნულ ყრილობაზე.
საქართველოს ფეხბურთის ფედერაცია და შპს საფეხბურთო დავების განმხილველი სპორტული ტრიბუნალი ზურაბ ბიწაძის ქმედებებს (კერძოდ, დავის განხილვის გაგრძელებას, გათავისუფლების შემდეგ გადაწყვეტილების მიღებას, საკუთარი თავის მედიატორად დანიშვნას, ასევე, ორგანიზაციის საქმეების და ორგანიზაციის ბეჭდის გადაუცემლობას) აფასებს როგორც მიზანმიმართულ პროვოკაციას - ზეგავლენა მოახდინოს ტრიბუნალის საქმიანობაზე და მოახდინოს 3 ოქტომბერს დანიშნული საქართველოს ფეხბურთის ფედერაციის ყრილობის დისკრედიტაცია.